திருவாரூர் மாவட்டத்தைச் சேர்ந்த வாக்காளர்கள் நகல் வாக்காளர் அடையாள அட்டை பெற விண்ணப்பிக்க அழைப்பு விடுக்கப்பட்டுள்ளது.
இதுகுறித்து மாவட்ட ஆட்சியர் எம்.சந்திரசேகரன் விடுத்துள்ள செய்திக் குறிப்பு: திருவாரூர் மாவட்டத்தில் உள்ள திருவாரூர், திருத்துறைப்பூண்டி, மன்னார்குடி, நன்னிலம் ஆகிய சட்டப்பேரவைத் தொகுதிகளுக்கான வாக்காளர் அடையாள அட்டை வழங்கும் மையங்கள் அந்தந்த வட்டாட்சியர் அலுவலகங்களில் செயல்பட்டு வருகிறது.
வாக்காளர் பட்டியலில் பெயர் இடம்பெற்றுள்ள வாக்காளர்கள் தங்கள் வாக்காளர் புகைப்பட அடையாள அட்டையை தவற விட்டிருந்தாலோ அல்லது பெயர் மற்றும் முகவரி திருத்தம் மேற்கொள்ள வேண்டியிருந்தாலோ நகல் வாக்காளர் புகைப்பட அடையாள அட்டை அல்லது மாற்று வாக்காளர் புகைப்பட அடையாள அட்டைகள் பெற்றுக் கொள்ளலாம்.
இதற்கு 001சி படிவத்தில் குடியிருப்பதற்கான ஆதாரத்துடன் ரூ.15 செலுத்தி வட்டாட்சியர் மற்றும் வருவாய் கோட்டாட்சியருக்கு மனு செய்து, நகல் வாக்காளர் புகைப்பட அடையாள அட்டை மற்றும் மாற்று வாக்காளர் அடையாள அட்டை பெற்றுக் கொள்ளலாம்.
இந்த மையங்கள் குறைதீர்க்கும் மையங்களாகவும் செயல்படுகின்றன. ஆண்டுமுழுவதும் இந்த மையங்களில் வாக்காளர் பட்டியலில் பெயர் சேர்க்க, நீக்க மனுக்கள் பெற நடவடிக்கை மேற்கொள்ளப்பட்டுள்ளது.
